Bin yıl eğer vasfın diyem bir zerresin tüketmeyem
Bir katrede yüz bin deniz bir noktasın şerh etmeyem
Ne mesel bağlasam olur ne hod gönül karâr kılur
Kim benzedir misl ü misâl hâşâ onu benzetmeyem
Kim ede bir nakş u sûret nakş u sûretden ol âzâd
Cümle akıllar sende mât niçe özür gözetmeyem
Çün akıl fenâya vara deli ola ne başara
Delilere sensin çâre deli oldum pes n’itmeyem
Öğret imdi dil ne desin şart oldur seni söylesin
Tevfîk yarı kılar ise gayrı dile söyletmeyem
Ne der isen sen de bana koma beni benden yana
Benim hâcetim bu sana bana beni istetmeyem
Çün pâdişâh güçlü ola pes kul fuzûl işli ola
Ben seninim bana ne gam ger suç edem ger etmeyem
Çün kim girdim bu denize ne kenâr var ne cezîre
Çün dört yanımdan mevc vura teknem kavî hîç batmayam
Benim değil bu keleci varlık senin Yûnus neci
Çün dilime sensin kâdir sensiz lisân depretmeyem