Ey beni ayıblayan gel beni aşkdan kurtar
Ger elinden gelmezse söyleme fâsid haber
Âşıkların ahvâli mâşûk katında biter
Sözün var ona söyle benim elimde ne var
Dost yüzünden nikâbı her kim giderdi ise
Hicâb kalmadı ona ayruk ne hayr u ne şer
Hîç kimesne kendiden hâlden hâle gelmedi
Âşıkların cânına mâşûka vurur minkâr
Kim ki aşk kadehinden bir zerre içdi ise
Ona ne akl u ne us ne esrik ü ne humâr
Tek ben değilem âşık ol mâşûk nazarında
Aşk yoluna cân fedâ benim gibi sâd-hezâr
Âşıkların hâlini âşık olanlar bilir
Aşk bir gizli haznedir gizli gerekdir esrâr
Korkarım söylemeğe şerîat edebinden
Yoksa eydeydim sana dahi ayruksu haber
Kim vere bu dil ile ol mâşûkadan haber
Meğer ol kimseler kim cân içinde cânı var
Yûnus ölürse ne gam aşk içinde kardaşlar
Aşk yoluna uyağan mâşûk burcunda biter