İki cihân zindân ise gerek bana bostân ola
Ayruk bana ne gam gussa çün inâyet dostdan ola
Varam ol dosta kul olam her dem açılam gül olam
Hem söyleyem bülbül olam durağım gülistân ola
Ol dost yüzün gördü gözüm erenlere toprak yüzüm
Söz bilene iş bu sözüm gerek şekeristân ola
Sensiz iki cihân benim zindân görünür gözüme
Senin aşkınla bilişen gerek hâssü’l-hâsdan ola
Her davâdan geçen kişi Hak’dan yana uçan kişi
Aşk şarâbın içen kişi geh esrük geh mestân ola
Kördür münâfıkın gözü yarın kara koyar yüzü
Halkın bana acı sözü gerek şekeristân ola
Her dem yüzüm yere vuram Allah’ıma şükür kılam
Ben benliğim dosta verem ne davâ ne destân ola
Aşka döyemedi özüm gensizin açıldı râzım
Yûnus senin iş bu sözün âlemlere destân ola