Erenlerin yolları inceden ince imiş
Süleymân’a yol kesen şol bir karınca imiş
Ol karınca söyledi Süleymân’a yol dedi
Ol karınca söylediği cevâb alınca imiş
Götürmedi kimsene kimsenenin güçünü
Güç götürdüm diyenler eli erince imiş
Kim kime ne der ise eğer hayr u eğer şer
Allah verir cezâsın gele yol ince imiş
Gönlüm bana eydürdi seni severim derdi
Gönlüm seni sevdiği dosta erince imiş
Gönlüm eydür varayın sana geri geleyin
Gönlüm uyduğu bana dostu bulunca imiş
Yârenlerim eydürler âşık melâmet gerek
Geldi benim başıma ol söz yerince imiş
Âşıkın gözü yaşı dün gün dökülür durmaz
Âşık kan ağladığı mâşûk sorunca imiş
Dört kitâbın mânâsın okudum tahsîl kıldım
Aşka gelicek gördüm bir ulu hece imiş
Ben dervîşim diyenler harâmı yemeyenler
Harâmın yenmediği ele girince imiş
Eydürler fülân öldü mülk ile mâlı kaldı
Ol mâlın irkildiği ıssı ölünce imiş
İki kişi söyleşir Yûnus’u görsem diye
Biri eydür ben gördüm bir âşık koca imiş