Hakîkat her vücûdun cânı aşkdır
Ne cân kim cân içinde cânı aşkdır
Bu cân cismimi kâim tutar ancak
O cân kim zâhir ü pinhân-ı aşkdır
Bu aşk elinde âciz cümle eşyâ
Ne sır kim kamu sergerdân-ı aşkdır
Bu aşk kandalığın bilmez kimesne
Bilirler haddini pâyân-ı aşkdır
Gehî Leylî olur Mecnûn gözünden
Geh olur Leylî’nin hayrân-ı aşkdır
Gehî kan yaş akar Yâkûb gözünden
Geh olur Yûsuf-ı Ken’ân-ı aşkdır
Dirildir ölüyü Îsâ deminde
Geh olur Mûsî-i Ümrân-ı aşkdır
Ene’l-Hak çağırır Mansûr dilinden
Cüneyd’de cübbe vü irfân-ı aşkdır
Bu aşkın türlü türlü rengi çokdur
Kimi giryân kimi handân-ı aşkdır
Fedâ bu aşka cânım dînim olsun
Bana hem dîn ü hem îmân-ı aşkdır
Ne Yûnus onda yüz bin cân-ı Yûnus
Kabûl etsin ne kim kurbân-ı aşkdır
Vücûdun cübbesin aşk ile çâk et
Dalagör ona kim ummân-ı aşkdır