Ey leyl, ey avâlime Hakk’ın inâyeti
Saçtın kulûb-u ümmete nûr-u beşâreti
Buldu husûl cezbeli kalbimde bir hurûş
Atf eyledim sevâbıka çeşm-i basireti
Karşımda bir cihan-ı kemâl oldu münceli
Billâh mucib oldu temâşâsı hayreti
Ey âfitab-ı subh, tecellâ-yı kirdigâr
Nûrunla buldu âlem-i ekvân bu sureti
Furkân ki bir kitab-ı hakayık-nisâbdır
Derc etti anda Hak nice envâr-ı hikmeti
Tefsir eder celâil-i kadr-i Muhammed’i
Tavsif eder o mihr-i münîr-i nübüvveti
Bedrü’d deca, hatib-i ümem, sâhibü’l livâ
Hakk’ın Habib-i Ekrem sahib-fazileti
Nûr-u mukdesindir âyâ rûh-u kâinat
Dünyaya gösteren bu tarîk-ı hidâyeti
*
Bahr-i ulûmsun sen âyâ ekmelü’r rüsul
Hatm eyledin kitab-ı celil-i risâleti
Sen eşref-i cihansın, illâ cihâniyân
İzhar kıldı sende kemâl-i şerafeti
Ey hâzin-i künûz-ı kerem, Rabb-i erham’ın
Yağdı seninle âleme bârân-ı rahmeti
Ey leyl, ey hazine-i Kudsiyye-i rahim
Feyzin cihana verdi Berat-ı saadeti