Sensin benim cânım cânı sensiz karârım yok durur
Uçmak’da sen olmaz isen vallâh nazarım yok durur
Baksam seni görür gözüm söyler isem sensin sözüm
Seni gözetmekden dahi yiğrek şikârım yok durur
Söyler isem dilimdesin ger tek dursam gönlümdesin
Gönlüm gözüm seni sever ayruk nigârım yok durur
Çün ben beni unutmuşam şöyle ki sana gitmişem
Ne kâlde ne hâlde isem bir dem karârım yok durur
Eğer beni Cercîsleyin yetmiş kez öldürür isen
Dönem geri sana varam zîrâ ki ârım yok durur
Seni gördüm güneş gibi Cennet bana zindân gibi
Cennet’ine zâhidin ko Uçmak’da arzûm yok durur
Yûnus dahi âşık sana göster dîdârını ana
Yârim dahi sensin benim ayruk dîdârım yok durur