Cânım ben ondan bunda ezelî âşık geldim
Aşkı kılavuz tutdum aşka ulaşıp geldim
Değilim kâl ü kîlde yâ yetmiş iki dilde
Yad yok bana bu ilde onda bilişip geldim
Geçdim hodbîn ilinden el çekdim dükelinden
Ol ikilik bâbından birliğe bitip geldim
Dört kişidir yoldaşım vefâdârım râzdaşım
Üçüyle hoşdur başım birine buşup geldim
Ol dördün birisi cân biri dîn biri îmân
Biri nefsimdir düşmân onda savaşıp geldim
Bir kılı kırk yardılar birin yol gösterdiler
Bu mülke gönderdiler o yola düşüp geldim
Aşk şerbetinden içdim on iki ırmak geçdim
Denizler bendin deşdim ummândan taşıp geldim
Ben ondan geldim bunda yine varırım onda
Ben onda varasımı onda tanışıp geldim
Azrâîl ne kişidir kasd edesi cânıma
Ben emânet ıssıyla onda bitrişip geldim
Aradım çıkdım bir uca eğlendim teferrüce
Eren soyun soylayıp ol soya düşüp geldim
Yûnus Emre’ye ne gam âşık melâmet bednâm
Küfrüm îmâna şol dem onda değişip geldim